<html><head><meta http-equiv="Content-Type" content="text/html; charset=utf-8"></head><body style="word-wrap: break-word; -webkit-nbsp-mode: space; line-break: after-white-space;" class=""><div style="margin: 0px; font-stretch: normal; line-height: normal;" class="">De tempo al tempo la Akademio de Esperanto publikigas tiel nomatajn Oficialajn Aldonojn (OA). Ilia celo estas normigi la lingvon aldonante vortojn al tiuj en la Fundamento de Esperanto. La Fundamenta vortaro kaj \u0109iuj Oficialaj Aldonoj kune konsistigas la Akademian Vortaron, kiun sekvu \u0109iuj kompilantoj de la ordinaraj vortaroj (ekzemple PIV).</div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class="">En septembro la Akademio aprobis la 10-an Oficialan Aldonon, kiu estas tre longa: \u011di enhavas 420 radikojn kaj 832 vortojn a\u016d plurvortajn terminojn derivitajn de ili. La ka\u016dzo de \u011dia nekutima amplekso estas, ke \u011di enhavas \u0109efe geografiajn terminojn kaj nomojn de diversaj gentoj kaj lingvoj, el la tuta mondo.</div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class="">Por ni finnoj estas interese, ke la radiko <i class="">finn-</i> fari\u011dis nun oficiala; pli frue \u011di estis ofte menciata en la akademiaj listoj de \u201drekomendataj\u201d geografiaj terminoj, sed tio ankora\u016d ne signifis oficialigon. Kiel nomon de nia lando la 10-a OA mencias unuavice la formon <i class="">Finnlando</i>, sed oni rajtas uzi anka\u016d <i class="">Finnujo</i>, kun la oficiala sufikso -<i class="">uj-</i>, kaj <i class="">Finnio</i>, kun la neofiala sufikso -<i class="">i-</i>. Oni povas esperi, ke la oficialigo de <i class="">finno</i> kaj <i class="">Finnlando</i> definitive \u0109esigos diskuton pri <i class="">suomo</i> kaj <i class="">Suomio,</i> kiu de tempo al tempo reaperas.</div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class="">La vorto <i class="">finno,</i> kiel ordinare \u0109iuj tiel nomataj gentonomoj, havas du \u0109efajn signifojn. \u011ci povas signifi anon de certa gento a\u016d homgrupo, kiu parolas la finnan lingvon kaj lo\u011das \u0109efe en Finnlando, sed iom anka\u016d en aliaj landoj. Sed \u011di povas signifi anka\u016d iun ajn lo\u011danton de Finnlando. En la dua senco oni povas la\u016dnecese uzi la vorton <i class="">finnlandano,</i> sed ordinare <i class="">finno</i> sufi\u0109as: se oni diras, ke la finnoj \u015datas sa\u016dni, tio ne signifas, ke nur la finnlingvaj finnoj tion \u015datas.</div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class="">Por difini la <i class="">finnan lingvon, </i>la Akademio oficialigis anka\u016d la radikon <i class="">Ural</i>-. En geografio oni nomas <i class="">Uralo </i>montaron kaj riveron \u0109e la limo de E\u016dropo kaj Azio. La finna lingvo, kiel anka\u016d ekzemple la estona kaj la hungara, apartenas al lingvofamilio nomata <i class="">uralaj lingvoj.</i> (Iuj kutimas diri, ke la finna estas <i class="">finn-ugra</i> lingvo. La termino <i class="">finn-ugra</i> signifas a\u016d \u011duste la samon kiel <i class="">urala </i>a\u016d, alternative, la plej grandan subgrupon de la uralaj lingvoj. La radiko <i class="">ugr-</i> restas neoficiala.)</div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class="">La 10-a OA inkluzivas anka\u016d la nomojn de la plej multaj \u0109efurboj de diversaj landoj kaj de la plej multaj urboj de la Universalaj Kongresoj de Esperanto. Oficialaj fari\u011dis nun <i class="">Helsinko</i> kaj <i class="">Tampereo.</i> La nomo de la plej nova finna kongresurbo <i class="">Lahtio</i> tamen ne estis oficialigita pro problemo en \u011dia sonstrukturo: ankora\u016d neniu oficiala vorto havas la konsonanton <i class="">h</i> anta\u016d alia konsonanto. Kompreneble la mankanta oficialigo ne malhelpas la\u016dpla\u0109e uzi la nomon, kiu ja aperis en \u0109iuj kongresaj dokumentoj. Anka\u016d la nomo de la litova \u0109efurbo kaj kongesurbo <i class="">Vilno</i> plu restas neoficiala pro malsamaj opinioj pri \u011dia plej ta\u016dga formo.</div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class="">Ofialigita estis la nomo de la <i class="">Balta Maro, </i>sed ne la <i class="">Finna Golfo, </i>kiu estas pli malgranda marparto<i class="">. </i>El niaj najbaraj landoj kaj popoloj, <i class="">estono</i>, <i class="">Estonujo, svedo, Svedujo </i>kaj <i class="">norvego, Norvegujo</i> estis oficialigitaj jam en la 8-a OA; <i class="">ruso</i> kaj <i class="">Rusujo (Ruslando)</i> estas Fundamentaj. Anka\u016d <i class="">latvo, Latvujo</i> estis en la 8-a OA, sed <i class="">litovo, Litovujo </i>ricevis oficalan statuson nur nun samtempe kun <i class="">finno, Finnlando.</i> Pri \u0109iuj landoj, kies nomoj estas formitaj kun la oficiala sufikso <i class="">-uj-</i>, oni rajtas uzi anka\u016d variantojn kun la neoficiala sufikso <i class="">-i-.</i></div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class="">La gentonomoj <i class="">finno</i> kaj <i class="">litovo</i> devis atendi sian oficialigon tiel longe pro duboj pri ilia formo. Iuj esperantistoj ne \u015datis la duoblan konsonanton <i class="">-nn- </i>ene de radiko; tiaj duoblaj konsonantoj ja estas maloftaj en Esperanto (escepte de kunmetitaj vortoj: <i class="">sennoma</i>), sed jam la Fundamento enhavas la virinan nomon <i class="">Anno. </i>Rilate la vorton <i class="">litovo, </i>temis pri tio, \u0109u \u011duste tiu formo de la radiko estas la plej internacia. Sed nun la Akademio do flankenmetis tiajn dubojn kaj faris unusence aproban decidon pri <i class="">finno</i> kaj <i class="">litovo</i>.</div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class="">La 10-a Oficiala Aldono aperos en la retejo de la Akademio, sed estas jam nun legebla ekzemple en Libera Folio:</div><div style="margin: 0px; font-stretch: normal; line-height: normal;" class=""><a href="https://www.liberafolio.org/2023/10/07/10-a-oficiala-aldono-al-la-universala-vortaro/" class="">https://www.liberafolio.org/2023/10/07/10-a-oficiala-aldono-al-la-universala-vortaro/</a> </div><p style="margin: 0px; font-stretch: normal; line-height: normal;" class=""> </p><div style="margin: 0px; font-stretch: normal; line-height: normal;" class=""><i class="">Jouko Lindstedt,</i> akademiano</div><div class=""><br class="Apple-interchange-newline"><br class="Apple-interchange-newline">
</div>
<br class=""></body></html>